La AT quier prejudicar outra beç la Tierra de Miranda

L’Autoridade Tributária (AT) dibulgou anstruçones eilegales subre l modo d’abaluaçon de l balor de las barraiges, para eifeitos de lhiquidaçon i cobrança de l IMI.
Segundo essas anstruçones, ls eiquipamientos que fázen parte de las barraiges, specialmente las cumpuortas, las turbinas, ls giradores, ls eilebadores i todos ls restantes eiquipamientos que son andispensables a la produçon
d’einergie eilétrica, nun éntran pa l cálculo de l balor tributable. Antrarien solo las custruçones an cimiento i piedra. Pa la AT, anton, las barraiges nun son barraiges, son represas d’auga.
Ora, la lei stablece, de forma spressa i sin selombras para qualquiera dúbeda, que todos ls eiquipamientos qu’antégran ls eimobles, abarcando ls “eiquipamientos de lhazer” (sic la redaçon de la lhei), son tenidos an cunta na abaluaçon de l IMI. Essas anstruçones biólan l própio cunceito de prédio, que la lei stablece cumo ua custruçon cun balor eiconómico, ou seia, cun capacidade de produçon de rendimientos. I las barraiges nun prodúzen qualquiera rendimiento sien ls eiquipamientos que deilhas fáien parte.
Este ye solo un de ls muitos i grabes erros i eilegalidades daqueilhas anstruçones.
La AT stá cun azar relatibamente al assunto de las barraiges. De cada beç qu’eimite anstruçones ou antendimientos, erra, biola la lei i cuntradiç-se quaije siempre la si própia. Este sistemático azar ye acumpanhado dua stranha
coincidéncia. Ye qu’estes erros beneficían siempre la EDP i prejudícan siempre l Pobo de la Tierra de Miranda. Ye muito azar i muita coincidéncia. L balor de ls eiquipamientos corresponde a arrimado 2/3 de l balor de las barraiges, assi qu’este antendimiento de la AT ye ua einorme borla fiscal ne l IMI i ne l IMT pa la EDP i pa la Movhera.
Se la AT quier saber l balor de las barraiges, basta ir a ber a la cuntabelidade de la EDP i apurar qual l balor pul qual las cuntabelizou quando las custruiu. Ou la cuntabelidade de la Movhera, adonde stá l balor de la sue aquesiçon, que ye l mais reciente balor de mercado.
Estas anstruçones ténen de ser eimediatamente rebogadas i substituídas por outras, que cúmpran la lei. Mas isso nun chega. Ye preciso ambestigar l cuntinado cerimonial de subserbiéncia de la AT relatibamente a la EDP.
Apelamos, mais ua beç, a l’anterbençon de ls órganos d’anspeçon, d’ouditorie i d’ambestigaçon de l Stado. Eisigimos, de nuobo, essa ambestigaçon, an special, a la Procuradorie-Giral de la República, al Tribunal de Cuntas i a l’Anspeçon Giral de Finanças.
Todos ls órganos de l Stado stan, ou deberan star, al serbício de l Anteresse Público, que ten qu’adominar, mesmo contra ls mais poderosos i manhosos anteresses anstalados.
Tierra de Miranda, 8 d’outubre de 2023

https://terrademiranda.org/wp-content/uploads/2023/10/A-AT-pretende-prejudicar-PT_MIR.pdf