Pagai ls ampostos debidos

Pagai ls ampostos debidos

L Mobimiento Cultural de la Tierra de Miranda acunseilha la EDP i la Movhera a
pagáren l IMI i todos ls ampostos debidos pul negócio de las barraiges.
La deliberaçon de l Senhor Secretairo de Stado de ls Assuntos Fiscales, de mandar que se faga
la liquidaçon i cobrança de l IMI, bieno poner a la proba l sentido de respunsabelidade social
de la EDP i de la Movhera.
L IMI ye un amposto local, que ls cidadanos de la Tierra de Miranda i de Pertual
sáben que ye debido puls titulares d’eimobles, por mais baixo que seia l sou balor. Por isso,
todos sabemos que ye justo que quien beneficia cun la riqueza de la nuossa Tierra pague ua
cuntribuiçon mínima pu la riqueza que deiqui lhieba.
Solo astanho, la Movhera, cun la riqueza produzida na nuossa tierra, faturou
arrimado a 300 milhones d’ouros i ye, al mesmo tiempo, titular d’eimobles de mais alto balor
na nuossa Tierra, de l mesmo modo que la EDP l era até 2020. Sabemos agora que l IMI ye
debido dezde siempre.
Por isso, ye cun spetatiba que speramos que la EDP i la Mobhera hónren ls sous
deberes legales quando fur pago l IMI debido. La sue situaçon debedora i l apuramiento de l
respetibo balor son de determinaçon mui simples i rápida, cumo l son para todos ls titulares
d’eimobles an Pertual.
Speramos, por isso, que l bun antendimiento i l sentido de justícia fálen mais alto.
Speramos que la Movhera i la EDP déien un sinal de que stan cumprometidas cun l
zambolbimiento de la nuossa Tierra.
Acunselhamos ls respunsables de las dues ampresas a que decidan an funçon de l
que ye justo i que téngan cumo eisemplo de decison l sentido de respunsabelidade social.
L justo, l que stá d’acordo cun un modelo de respunsabelidade social, ye pagáren
boluntariamente l IMI, assi cumo ls restantes ampostos debidos, i que nunca mais se quérgan
scapar de las sues respunsabelidades tributairas, cumo se passa cun todos ls cidadanos
cuntribuintes.
Assi speramos.

Tierra de Miranda, 12 de Febreiro de 2023